Dapi ils 12 da mars 2022 – cura che las reglas dal Cussegl federal pertutgant il status S èn entradas en vigur – èn 1'771 persunas vegnidas assegnadas en il Grischun. 290 da quellas èn puspè turnadas u han dà si voluntariamain lur status, autras han midà il chantun.
Actualmain vivan 1'408 persunas fugidas da l'Ucraina en il Grischun (favrer 2023), en Svizra èn quai 62'820 (december 2023). Var dus terz da las persunas fugidas da l'Ucraina en Grischun vivan tar persunas privatas, il rest en ils diesch alloschis collectivs.
Ir a scola en il Grischun
Fin ussa èn 350 uffants fugids da l'Ucraina vegnids integrads en scolas grischunas. 225 dad els vivan tar persunas privatas e van en las scolas popularas da las vischnancas. 125 vivan en ils alloschis collectivs dal chantun e la gronda part dad els van er en las tschintg scolas per uffants fugids en il Grischun. Quai ensemen cun 86 uffants fugids d'auters pajais sco per exempel da l'Afganistan, la Tirchia, la Somalia e l'Eritrea.
Chattar lavur en il Grischun
Persunas cun il status da protecziun S han er il dretg da lavurar. Il chantun ha dà la lubientscha per lavurar a 292 persunas da l'Ucraina cun il status S – a 199 dunnas ed a 93 umens.
Tenor il chantun lavuran 20% da las persunas cun status S ch'èn en la vegliadetgna da lavur. Ina gronda part lavura en il sectur da la gastronomia ed hotellaria, var 13% lavuran en la branscha da nettegiar. Intgins dals Ucranais e da las Ucranaisas cun status S lavuran era en l'agricultura ed en il sectur da sanadad.
Laschar encrescher
La managera da banca Oksana Koroliak e sia figlia Sascha èn arrivadas la mitad da mars dal 2022 en Svizra, e lura a Ramosch tar ina famiglia ospitanta. Quella giada eran ellas anc en la cretta che la guerra fiss bainprest a fin, e ch’ellas pudessan turnar suenter dus trais mais a chasa.
Vegni èsi tut auter, tut va bler pli ditg che pensà. Oksana lavura en in hotel ed emprenda tudestg, Sascha va a scola e va cun skis. Durant las vacanzas da Chalandamarz vulan ellas ir en l’Ucraina, per visitar il bab da Sascha e la tatta. L’encreschadetgna è pli gronda che la tema.
