A la davosa sesida dal parlament da Cuira è vegnì inoltrada in'incumbensa da tractar il dumber da las persunas en la suprastanza da la citad. Formulà quella han las partidas Il Center, la Gliesta libra, La Verda e la Partida verd-liberala. Gia insaquantas giadas è quest punct stà en discussiun. Uschia era l'onn 1995. Da lez temp aveva la populaziun da Cuira dentant votà Na.
Tenor Tino Schneider – dal Center e commember dal parlament da la citad – saja la situaziun uss in pau in'autra: La populaziun saja creschida ils davos 30 onns per 7'000 persunas. Quai muntia ch'era las pretensiuns a la suprastanza vegnan adina pli grondas.
Che nossa executiva consista mo da 3 commembers n'è per nus betg pli confurm al temp.
Proximamain vegn il parlament a tractar l'incumbensa. Sche quella vegn acceptada en quest gremi, vegn la suprastanza a s'occupar da la chaussa.
Il tema ha gia fatschentà avant intgins mais
Ina partida ch'è cleramain per in augment da commembers da la suprastanza da citad è il Center. Il cusseglier communal Tino Schneider è da l'idea ch'il dumber da persunas n'è betg pli adattà a la grondezza da la citad. Pervia da quai pretenda el che quai vegn discutà ils proxims mais. Sumegliant vesa quai il president da la fracziun dals verds dal parlament da Cuira, Andreas Schnoz. Per el èsi temp da midar insatge.
Jau pens che quai avess grond potenzial.
Anc nagina opiniun n'ha la PS. La presidenta da fracziun Corina Cabalzar di ch'els stoppian anc discutar quai en la partida. Er la PPS è indecisa, ma els sa fan quitads per ils raps. Duas novas plazzas a temp cumplain pudessan vegnir charas.
Jürg Kappeler, il president da la fracziun da la partida verd-liberala, vesa quai fitg critic.
Jau chat ch'i fiss tut fauss, sch'ins procurass puspè per malsegirezza cun l'introducziun da duas novas persunas.
In'opiniun fitg clera ha la PLD da Cuira: Els èn cleramain cunter ina midada. Quai di Rainer Good, president da la partida. Trais persunas en la suprastanza sajan effizient, bunmartgà ed haja paucas interfatschas.
L'idea d'engrondir l'executiva na chaschuna naginas grondas euforias en il parlament. La gronda part da las partidas è critica. Perquai n'èsi betg fitg probabel ch'i vegn a dar dapli sezs en la suprastanza da la citad da Cuira tar las proximas votaziuns en quatter onns.
