En lur rapport tar l'incumbensa d'auzar la grondezza dal cussegl da la suprastanza scusseglia lezza actualmain da far quest pass. Quai per differentas raschuns:
- I custass bun in milliun francs per ils biros ed ils collavuraturs e collavuraturas ch'i duvrass en pli.
- I fiss pli cumplex pervia dad ina nova repartiziun da departaments che funcziuna uschia sco ella è ussa gia bain, sco il cussegl da la citad scriva.
- Plinavant vegn argumentà ch'i dettia era autras pussibilitads da schliar sfidas ch'i dettia ussa pli simpel. Uschia propona il cussegl da la citad d'introducir persunas da stab che sustegnan ils cussegliers – per exempel tar dossiers e decisiuns.
Reparter las incumbensas sin dapli spatlas
Tino Schneider da la partida il Center, e che era sez era part dals parlamentaris che han inoltrà l'incumbensa, di envers il schurnal regiunal da SRF, ch'el na chapeschia betg tut quests arguments. Tenor el fissan ils raps bain investids. Il sistem cun dapli persunas en la regenza funcziuneschia era senza problems en autras citads dad ina sumeglianta grondezza.
Latiers è el dal avis che ins pudess uschia reparter meglier las forzas, i dess uschia ina meglra represchentaziun da la citad ed ins pudess medemamain schliar meglier la sfida da la substituziun en cass ch'in cusseglier croda ora per in temp.
Uschia èsi era stà il cas avant in onn cura che la cussegliera da la citad Sandra Maissen era crudada ora per in pli lung temp. Era questa situaziun ha manà al giavisch da divers parlamentaris d'auzar il dumber.
Sche il parlament sa lascha ussa persvader da la cuntraproposta da la suprastanza da la chapitala sa mussa lura en la proxima sesida dal parlament.