Propi cuntent cun il dumber da giasts sur ils dis da festa n’è nagina manadra e nagin manader dals bogns cuverts che RTR ha dumandà. Tranter auter èn quai Sedrun, Andeer, Tavau, San Murezzan e Scuol. La bilantscha tuna tar tuts circa tuttina: Enfin trais giadas damain giasts ch'èn cumparegliaziun cun ils dis da festa avant la pandemia. Sulet a Tavau saja la bilantscha mediocra, di Samuel Rosenast da Tavau turissem:
2G+ stat tuttina enta pais. Ins na sa betg cumparegliar las cifras cun avant la pandemia.
Giasts nars pervia da 2G+
Blers giasts sajan stads cuntents ch’ils bogns han quest onn gì avert sur ils dis da festa, betg sco durant il 2020. Ma i haja era dà intgins ch'hajan gì pauc chapientscha per las mesiras.
Ils giasts n'han betg pazienza. Per part han els perfin detg insultas envers il persunal.
Uschia hajan ils bogns era stuì trametter a chasa pliras persunas per di, perquai ch’ellas n’eran betg vaccinadas, guaridas u testadas.
Consequenzas finanzialas
Las consequenzas finanzialas fetschian mal, na sajan dentant betg fatalas. Las manadras ed ils manaders dals bogns cuverts en il Grischun, èn cuntents, ch'els han dastgà laschar avert lur manaschis quest onn. Uschia speran els per l'ina era fitg ch'il Cussegl federal na prendia betg mesiras pli severas e per l'autra, ch'il persunal restia sauns e ch'els na stoppian a la fin betg serrar las portas pervia da gliez.
