Surmuntar ils obstachels tar las medias rumantschas

Durant ses emprims 100 dis en uffizi ha il nov secretari general da la Lia Rumantscha, Martin Gabriel, surtut gì da s'occupar cun l'avegnir da «La Quotidiana». Ed era en il futur vegnan las medias rumantschas a restar in dals gronds temas da Gabriel sco manader dal project medias rumantschas 2019.

Laschar ir video «Ils emprims 100 dis da Martin Gabriel – emprim facit dal secretari general da la Lia»

Ils emprims 100 dis da Martin Gabriel – emprim facit dal secre...

2:45 min, Telesguard dals 10.10.2017

La dumonda, co i duai ir vinavant cun la «La Quotidiana» e cun las medias rumantschas en general, vegn ad occupar fermamain il secretari general da la Lia Rumantscha, Martin Gabriel. Ins n'ha numnadamain chattà nagin manader per il project medias rumantschas 2019. Uschia surprenda Martin Gabriel sez questa lavur. Entras il project vulan ins sclerir ils basegns da las Rumantschas ed ils Rumantschs pertutgant medias ed uschia chattar ina schliaziun a mesa vista.

«  Nus lain elavurar propostas ensemen cun la populaziun. »

Martin Gabriel
secretari general Lia Rumantscha

Martin Gabriel duai vegnir sustegnì en quest project tras duas persunas. Gia fixa è Eva Riedi, che vegn a cussegliar davart la communicaziun. En discussiun è la Lia cun Hansi Voigt, che ha mess en pe la gasetta online «watson».

Medias rumantschas n'èn betg la suletta sfida

Sper il project medias rumantschas 2019 spetgan tenor Martin Gabriel era anc autras sfidas, auters temas. Impurtant saja il giubileum da 100 onns da la Lia Rumantscha. Qua veglia la Lia metter in accent naziunal. Rinforzar vul Martin Gabriel era la lavur cun ils Rumantschs en la diaspora. In auter accent metta il secretari general da la Lia Rumantscha sin l'accumpagnament da las vischnancas tar fusiuns.

RR actualitad 07:00