In telefon, in curt discurs e gia è l'ambassadur da la Gronda Britannia James Squire stà en chasa RTR per dar in'intervista davart sia visita en il chantun Grischun.
Cumenzà ha tut cun la pledadra da medias da l'ambassada britannica. Ella è vegnida tut spontan tar il retschaviment dad RTR ed ha ditg ch'ella discurriss gugent cun in reporter u ina reportra. Noss reporter Gian Carlo Candinas ha sinaquai beneventà e discurrì cun la pledadra da medias. Curt suenter è stà James Squire tar RTR per far in'intervista.
Visita en il Grischun per emprender d'enconuscher la cultura e las linguas
James Squire ha visità il Grischun per emprender d'enconuscher meglier il chantun cun tut sias fassettas. Quai sin invit da la regenza grischuna, uschia ch'el è era vegnì beneventà en la Chasa grischa dal president da la regenza Peter Peyer.
La regenza grischuna tgiria annualmain contacts cun represchentantas e represchentants da stadis esters en Svizra. Ils discurs sajan elements impurtants da las relaziuns externas dal chantun, scriva la regenza grischuna en ina communicaziun a las medias.
Cun ils stadis vischins e cun ils pajais ch'han relaziuns spezialas cun la Svizra e cun il Grischun vegnian discutadas savens dumondas specificas actualas. Autras visitas servian en emprima lingia a barattar experientschas sin il champ cultural, economic e politic.
La visita da l'ambassadur ha cuzzà dus dis ed el ha visità diversas interpresas ed occurrenzas en l'entir chantun.
