Anc betg gì temp da visitar tut ils emploiads
L'onn 2005 è Martin Hug sa chasà a Flem. Dapi lura ha el lavurà per las pendicularas da l'Arena Alva. Suenter 15 onns ha el fatg la midada en la politica ed è vegnì elegì en l'emprim scrutini encunter dus auters candidads. In era l'anteriur president da Flem.
En ses emprims 100 dis n'ha Martin Hug betg gì temp da visitar tut ses emploiads, ma quai vegnia el anc a prender suenter. Las pli grondas sfidas per Hug èn tranter auter l'infrastructura per il Lag la Cauma, la halla da glatsch Prau la Selva ed il nov access a Cassons.
Jau na ma sent betg sco chastellan ed era mia dunna n’ha betg gugent sch'ins numna ella la «First Lady». Pertge quai n’è betg ina show d’ina persuna i dovra ina squadra per schliar problems.
Franar la depopulaziun
Il nov president da la Vischnanca Lumnezia è dapi 100 dis Daniel Solèr. El è il segund president da la vischnanca che ha fusiunà l'onn 2013. Grondas midadas n'ha il nov president anc betg stuì far, il pensiunament da persunal tar l'administraziun communala nizzegia la suprastanza per ina reorganisaziun da quella.
Dasper las fatschentas da mintga di è la Lumnezia pertutgada fitg da la preschientscha dal luf. Quel procura permanentamain per discussiuns e lavur supplementara. In ulteriur project che la Lumnezia sto ademplir è la revisiun da la planisaziun locala. Cun quella perda la vischnanca ina pulita part da las zonas da bajegiar. Tuttina vul il nov resident communal far tut il pussaivel per franar la depopulaziun che ha era tschiffà la Lumnezia.
Il post da president è absolut schia sco quai ch'jau avev imaginà. Ins sto s'endisar vid la nova rolla ch'ins ha sco president. Jau sun uss vidlonder da survegnir la survista da l'entir manaschi.
Mustér sco subcenter en Surselva
En ses biro da l’administraziun communala penda ina tabla cun las mesiras per la legislatura dal 2021 fin 2024 e la strategia per ils proxims onns. Uschia haja el la survista, di il nov president da la vischnanca da Mustér. Ina da las grondas finamiras è da far pli attractiva la vischnanca. Per exempel cun nizzegiar meglier parcellas verdas sco la parcella Hess ubain il prà cumin sut la claustra. «Ma surtut la variaziun fa plaschair a mai», di René Epp ch’è era deputà en il Cussegl grond.
Ussa less ins empruvar da trair il char e far or da noss vitg in subcenter attractiv en Surselva.
Bun’entschatta per vischnanca da fusiun
Ils emprims 100 dis sajan stads intensivs, ha ditg il president. Era sch’el haja 15 onns presidià l’anteriura vischnanca da Casti-Vargistagn, dettia anc bler ch’el stoppia emprender ad enconuscher.
Che l’entira suprastanza communala consista da purs na vesa Marco Dolf betg sco problem. Pli impurtant saja la savida che mintgin haja. Grazia che la suprastanza haja umens cun grond’experientscha da suprastanza saja pli simpel da prestar ina buna lavur. Actualmain saja la Muntogna da Schons vi da reparter da nov tut las incumbensas en la gruppa communala da selvicultura.
Sperar che la populaziun sa disia svelt vid la vischnanca fusiunada.