La stad 1879 glischa l’emprim pair electric grischun en il hotel Kulm a San Murezzan. Ils hotels mo era las resgias èn stadas da quest temp savens ils motors per il svilup da l’electricitad. En Surselva vala Rabius sco il piunier. Là era vegnì construì per ina resgia l'onn 1880 in'emprima ovra electrica. Il 1904 ha alura la vischnanca da Laax e dus onns pli tard la vischnanca da Sagogn construì emprimas ovras.
Turissem da skis ha fascinà ils Tuatschins
Gia il 1914 èsi vegnì fundà en Tujetsch l'emprim club da skis. Uschia vulevan ins promover l'ir cun skis era per ils indigens ed er il patratg da forsa pudair in di dar scola da skis era gia preschent da quest temp, di l'archivar communal ed expert da l’istorgia da la val Tujetsch, Tarcisi Hendry. Promover il turissem vuleva era dir, porscher in tschert standard e quai vuleva dir porscher electricitad, accentuescha Hendry.
Privats han dà la finala il stausch decisiv
Ina societad privata ha inoltrà il 1918 ina dumonda a la vischnanca d’eriger ina ovra d’electricitad, per porscher a tut ils convischins da Sedrun-Gonda-Camischolas e Rueras glisch. Uschia è vegnida fundada ina cumissiun cun il president Gion Felici Monn a la testa. Monn vala sco in dals motors da quest svilup, era perquai ch’el è stà 27 onns al timun da la vischnanca da Tujetsch. Sco di da fundaziun vala ils 7 da fanadur 1918. Uschia è vegnida erigida a Gonda l’emprima ovra electrica cun aua ord da la Val Strem.
RR actualitad 07:00