Il far pignas scalegl ha tradiziun en Surselva e surtut a Surrein, in vischinadi da la vischnanca da Sumvitg. Uschia èsi documentà en il conturn pliras chavas da crap scalegl ed era plirs «tschentapegnas». Dus giuvens umens Giachen e Gion Battesta Deplazes han medemamain cumenzà il 1919 cun chavar il crap scalegl e far pignas scalegl. La simpla lavur durant il temp mort, dasper il puresser, è durant ils ultims 100 onns creschida ad ina interpresa mesauna che dat lavur a set persunas.
Fin en Nova Zelanda
La pigna scalegl appartegn oriundamain tar mintga chasa da purs. Alura vegniva la lavur era fatga dal tuttafatg a maun cun guaffens simpels. Ma tut quai è sa midà ils davos onns. Il crap scalegl sto vegnir importà per pudair garantir qualitad dal crap e la lavur vegn fatga cun maschinas. Era vegnan las pignas Deplazes betg sulet en chasas grischunas mabain en l'entira Svizra. La pigna Deplazes che stat il pli dalunsch da Surrein è en la Nova Zelanda. Là ha Otto Deplazes tramess ina pigna e ses frar ha alura mess ensemen ella, declera Otto Deplazes cun in surrir.
RR actualitad 08:00