L’hotel Adula è vegnì avert l’onn 1890 sco hotel da cura cun 40 letgs. A l’entschatta era l’hotel mo averts la stad ed ils osps vegnivan a Flem per giudair la stad e l’aria frestga da la muntogna. Dasperas deva i ina vasta purschida da meds da curas.
1928 surpiglia la famiglia Hotz
L’onn 1928 han Walter e Constance Hotz, fin là il pèr da direcziun dal sanatori Tschuggen ad Arosa, cumprà la chasa da cura Adula ed han engrondì quella cun ina cuschina ed ina sala da mangiar. Era han els installà aua currenta ed in stgaudament a vapur. Uschia han els savì tener avert l’hotel durant l’enviern e savì dumbrar 900 pernottaziuns l’emprima stagiun d’enviern 1929/30.
Ils onns 1945 enfin oz
L’onn 1945 surpiglia la secunda generaziun da la famiglia Hotz, Heinz e Myrta Hotz-Turtach. Els han renovà ed engrondì vinavant l’hotel fin a 120 chombras. Era han els bajegià 1967 in bogn cuvert ed agiuntà a quel 1982 ina sauna, in bogn da vapur e stanzas da fitness. Il medem onn surpiglia la terza generaziun il manaschi, numnadamain Peter e Francisca Hotz-König. Sut lur direcziun è vegnì erigì la chasa annexa Soldanella cun grondas chombras dublas e stanzas da seminaris. Cun quest edifizi ha l’hotel Adula era cuntanschì sia grondezza actuala cun 173 letgs.
La 4. generaziun en il bloc da partenza
L’onn 2014 ha Corina Scheidegger-Hotz ertà l’hotel da ses geniturs, ch’èn morts entaifer curt temps ils onns 2013/14. Cun dus uffants pitschens n’aveva ella dentant betg il temp da surprender immediat ils affars da l’hotel Adula. Ord quai motiv han Beatrice ed Olaf Reinhardt surpiglià mez favrer 2015 la direcziun ad interim. Els vegnan a manar l’hotel enfin la fin da la stagiun d’enviern 2016/17. Lura vegnan els puspè a surdar la direcziun a Corina ed Alexander Scheidegger-Hotz.