«Quels 2 lieus èn uschè datiers in da l’auter ch’ina collaboraziun è evidenta. Latiers vegnan las colliaziuns cun viafier e pendicularas sin l’Alpsu, sco era l’idea dalla colliaziun cun ina pendiculara da Sedrun en il territori da skis da Mustér. Per quest motiv sun jau cleramain da l’opiniun che quels 3 lieus stoppian daventar ton pli svelt ina suletta destinaziun», di Franz Egle ch’è engaschà en differents gremis directivs da l’investur egipzian Samih Sawiris.
Sco quai che Egle ha ditg sin damonda dall’Agentura da Novitads Rumantscha, lavuria l'Andermatt Sedrun Sport SA era vid ina proposta per ina colliaziun da tariffas da las pendicularas d’Andermatt e Sedrun cun quellas da Mustér. Franz Egle spera ch’ì reussescha da chattar tant pli svelt ina soluziun. Tenor sias informaziuns lavuran ils representants dal turissem d’Ursera, Sedrun e Mustér il mument vid lur pretensiuns. Enfin la fin da l’onn duajan quellas ed era ils cumpromiss persuenter vegnir discutads. En bunamain in onn duessan ils 3 lieus allura furmar ina nova destinaziun turistica.