Atgnamain producescha e transporta l’interpresa Montalta betun e glera e fa stgavaments da tut gener.
L'idea da s'engaschar en il sectur da recicladi ha il possessur dall’interpresa Martin Montalta gì avant 25 onns. Tenor el era la taxa ch’el avess gì da pajar ad ina deponia per dismetter il rument da demoliziun memia auta, e perquai ha el cumenzà a reciclar sez quai rument.
Reciclar quai ch’è pussibel
Oz sa l’interpresa Montalta reciclar quasi tut quai ch’è era pussibel da reciclar.
La gronda part dal material reciclà è dentant anc adina il rument da demoliziun. 30 enfin 40% dal material elavurà vegn puspè duvrà.
La laina per exempel vegn manizzada ed arsa egl implant da combustiun da laina a Glion. Il chartun daventa puspè chartun ed ord las blatgas da plastic producescha ina interpresa da la bassa granulat. En tut vegn elavurà tar l’interpresa da recicladi Montalta 20’000 enfin 22’000 tonnas material per onn.