Il motiv da rimnar è stà, cura ch’el ha fatg ina lavur sur dal vischinadi da Segnas. Alura ha el cumenzà a rimnar nums da famiglias, l’emprim da sia famiglia Tenner-Schnoz. Suenter sajan autras da las vischnancas da Mustér, Tujetsch e Medel vegnidas vidlonder, perquai che questas vischnancas sajan colliadas entras maridaglias.
Ils fastatgs da si ‘atgna famiglia ha el pudì persequità fin ca. 1750. Mo per part po el schizunt reconstruir lingias fin ca. 1200 – quai grazia a l’internet.
Era en facebook
Per sia lavur ha Gion Tenner duvrà surtut cudeschs da batten, da lètgs e mortoris ed el tschertga actualmain infurmaziuns per ex. en figls uffizials, annunzias da morts, gasettas e medias. Facebook saja fitg interessant perquai che la generaziun giuvna publitgescha datas persunalas. Entras contacts cun auters perscrutaders vegn el dentant era tar infurmaziuns da indigens ch’en emigrads en autras terras. In exempel èn commembers da la famiglia Bisquolm da Mustér ch`èn emigrads en Germania.
Betg publitgar il mument
Ina genealogia cuntegn infurmaziuns sur da la derivanza d’ina famiglia, co ins è maridads e nua ch’ins stat, e sa chapescha era tgi ch’è parent cun tgi.
Gion Tenner ha registrà fin uss 30'000 nums da quasi 8800 famiglias. Mo sco el di na vul el publitgar, vul dir metter online, questas datas il mument.