Avant 30 onns era il sport da golf quasi nunenconuschent, almain en Surselva. Per promover il turissem da stad èsi vegnì projectà e realisà dapi lura pliras plazzas da golf en Surselva. Ma Selva, la plazza da golf dal club Sedrun, era l’emprima plazza da golf en Surselva e da lez temp in novum. Uschia n’avevi betg pli dà ina plazza da golf en Svizra dapi 35 onns, declera Bruno Flepp, che presidiescha il club da golf dapi quasi 10 onns.
Er en la regiun dal Gottard sajan els stads piuniers, ditg avant Andermatt. Ma els profiteschian sa chapescha uss da la vischinanza da Andermatt. Blers giasts vegnian er sur il pass per giugar golf a Selva, ma viver na possian els betg da las giugadras ed ils giugaders che gioghian sin lur plaz, mabain els vivian da las contribuziuns annualas. Dapi intgins onns scrivian els cifras nairas.
Malgrà blers commembers, la giuventetgna manca
Avant intgins onns hajan els avert il club, uschia na stoppian ins betg pli sa cumprar en il club. Els offreschian ina commembranza favuraivla, il sulet saja ch’ins stoppia suttascriver in contract per trais onns. Uschia possian ins dar golf e quai vegnia pauc pli char che ir cun skis, di Bruno Flepp. Fin uss n'haja quai anc betg gì propi effect, ma il squitsch na saja uss era betg enorm.
Els vivian bain ed hajan commembras fitg fidaivlas, circa la mesadad da la Bassa. Quels apprezieschian l'atmosfera famigliara en il club, quai na saja en la Bassa betg adina usità ed els giaudian il barat tut spezial, di Bruno Flepp che viva a Mustér. Perquai saja el fitg optimistic ch’il club da golf Sedrun possia anc festivar plirs giubileums.
