Cura ch'i dat orcans sco Vivian (favrer 1990) u Lothar (december 1999), lura reageschan ils pretschs da la laina spert, quai cun ir a bass. Il medem ha valì tar las turbulenzas dal curs euro e franc svizzer sco era tar la setgira 2018.
Tegnair enavos la laina per betg surchargiar la fiera
Ma en temps da crisa sa gidian las vischnancas ina cun l’autra, di Leo Thomann. El è il president da la Selva, l’associaziun dals proprietaris da guaud dal Grischun. Ins tegnia enavos la laina per betg surchargiar la fiera. Quai saja era capità per exempel dal temp da Vivian, cura che Leo Thomann lavurava sco selvicultur.
La solidaritad ha era funcziunà suenter tar Lothar.
L'excepziun: il temp da Stallinger
In artitgel da la gasetta «Guaud e Laina» dal 2015 mussa il svilup dals pretschs. Tranter 1974/75 e 1980/82 han ils pretschs nominals da pigns ed aviezs cuntanschì 180 fin 190 francs per meter cubic. Suenter èn els sa reducids. Sch’ins analisescha ils pretschs reals cun resguardar la chareschia, lura èn ils pretschs gia sa reducids a partir da 1974/75 cuntinuadamain fin circa ils onns 2005/2006.
In'excepziun hai dà fin uss en il Grischun durant il temp da la resgia gronda da Stallinger (2007-2010). Sco Leo Thomann di, haja Stallinger duvrà blera laina ed ils pretschs sajan ids fitg ad aut.
I constat ch’il chantun ha impundì raps, ma quai ch’ins fa mai endament è che las vischnancas han era profità da quai.
Reducziun per 30%
Ina grafica da la Selva mussa ch’ils pretschs da la laina èn sa sminuids suenter Stallinger per 30% en il Grischun. Quai surtut era en consequenza dal curs euro e franc svizzer, da la setgira da 2018 u dals orcans da l’onn passà.
RTR actualitad 08:00