Siglir tar il cuntegn

Header

Charta da l'Europa che mussa il dumber da giuvenils che derivan ord tge terra.
Legenda: Ils giuvenils derivan da la Svizra, Germania, Austria, Italia ed Ungaria. Grafica: RTR
cuntegn

Surselva 300 scolars benedictins da 5 pajais a Mustér

Per l’emprima giada s’inscuntran giuvenils da gimnasis benedictins en Svizra. E quai a Mustér da gievgia ils 30 da settember fin dumengia ils 2 d’october. Il gimnasi organisescha quest inscunter ensemen cun la claustra.

Record

Ils giuvenils derivan da la Svizra, Germania, Austria, Italia ed Ungaria. Ensemen cun persunas accumpagnantas sa tracta quai da ca. 300 giuvnas e giuvens da 13 -20 onns che derivan da la Svizra, Germania, Austria, Italia ed Ungaria. Quai saja in record da participants, perquai che fin uss s’inscuntravan tranter 60 ed 80 giuvenils, di il scolast e president dal comité d’organisaziun Kilian Grütter.

Ina part dal gimnasi da Mustér
Legenda: Ina part dal gimnasi da Mustér RTR, H. Giger

Tgirar contacts e spiritualitad benedictina

La finamira saja d’ina vart da tgirar ils contacts e da l’autra vart da intermediar insatge sur da la spiritualitad benedictina sin la via da furmaziun dals scolars. Perquai saja il motto da quest inscunter: “Scuvrir cristals e far traglischar els”, in motto che giaja bain a prà cun la regla da Son Benedetg, declera il frater Paul Tobler. Ils giuvenils pon lura er tschertgar cristals, lavar aur ubain far in’excursiun fin a la tgina dal Rain.

Il frater Paul era stà 2013 a l’inscunter da scolars benedictins en Germania. Là saja naschida l’idea d’organisar il proxim inscunter a Mustér.

RTR/hg

Artitgels legì il pli savens

Nach links scrollen Nach rechts scrollen