Mauro Loretz da Sedrun (el ha 26 onns ed è tschentapignas) e sia amia eran stas 2014 en il Nepal. Els han emprendì d’enconuscher la glieud e la terra cun las muntognas dal Himalaya. Suenter il terratrembel saja quai stà cler ch’els veglian gidar, di Mauro. El haja scrit ina brev en la gasetta locala, la Tuatschina, per rimnar daners. La finala saja vegnì ensemen dapli che quai ch’el veva quintà, numnadamain ca. 15'000 francs.
Reconstruì ina scola e gidà trais famiglias
Alura sajan el, sia amia Nora Honegger, l'ami Sandro Muscas e ses bab Franz Loretz ì en Nepal. En in vitg hajan els gidà a reconstruir ina scola. Mo els hajan era dà daners a trais famiglias per che quellas han pudì reconstruir lur chasas.
Mauro Loretz di ch’el veglia rimnar vinavant daners ; e forsa saja quai pussaivel da realisar puspè in project. En scadin veglia el ir puspè en il Nepal, perquai ch’el haja serrà en il cor la glieud e la terra.