Siglir tar il cuntegn

Header

L'hotel Waldhaus a Flem.
Legenda: L'hotel Waldhaus a Flem. Keystone
cuntegn

Surselva 40 milliuns per Hotel Waldhaus

Per l’areal da l’hotel Waldhaus a Flem datti ussa in cumprader. L’investider vul pajar 40 milliuns francs.

Tar l’Uffizi da concurs dal district Plaun èn ins fitg cuntent cun questa offerta, ha ditg Beat Caluori a Radiotelevisiun Svizra Rumantscha. Cura ch’il concurs da la Waldhaus Flims Mountain Ressort AG saja stà enconuschent, eran conuschiders ed involvids da l’opiniun che gia 25 milliuns saja ina buna summa. L’offerta da 40 milliuns è uschia tenor Beat Caluori ina buna offerta e mussia ch’i saja vegnì fatg buna lavur cun tschertgar investiders.

Era crediturs pon esser cuntents

La novitad vegn era legrar ils crediturs che spetgan anc sin daners per prestaziuns u urden vendì a l’hotel Waldhaus. Era sche na betg tut ils detagls davart quests crediturs èn tenor Beat Caluori sclerids è el optimistic: «Nus pudain oz ir da quai anora che nus vegnin da cuvrir 80% da las pretensiuns dals crediturs da 3. classa». Ils dabuns d’emprima e segunda classa, quai èn tranter auter era pajas, sajan uschia ni uschia curclads cumplainamain, ha ditg Beat Caluori vinavant.

L'ultim termin per offertas pli autas è ils 3 da december

Uss pon tut ils crediturs sco er terzas persunas anc far offertas pli autas. Sche nagin fa in’offerta sur 40 milliuns enfin ils 3 da december, lura vegn l’areal vendì a l’investider, scriva l’uffizi da concurs dal district. Datti pliras offertas, lura datti ina aucziun interna.

12 parcellas na fan betg part dal pretsch da vendita. Questas vegnan cunzunt nizzegiadas a moda agricula u forestala e vegnan vendidas pli tard.

RR novitads 08:00

Dapli da Surselvaavrir la Landingpage

Nach links scrollen Nach rechts scrollen