In chanzlist na duess betg sez far politica, di Reto Jörger – l'anteriur chanzlist da Val s. Pieder ch'è dapi in pèr emnas en pensiun.
Igl è in grond levgiament da betg pli esser responsabel per tut quai ch'ins vesa ed auda en il vitg. Quai è bel.
Turissem
Grazia a la vischnanca ha il turissem prosperà a Val. La vischnanca ha investì en las pendicularas ed en il bogn termal ed uschia inizià quest segment turistic. Ma era l’industria ha profità directamain da las intervenziuns da la vischnanca. L'aua da Val, u meglier ditg la funtauna s. Pieder, è en possess da la vischnanca. La maschaida d'industria e turissem haja preservà els da daventar ina monocultura.
Blers onns è quai dar e profitar capità maun en maun. Buns onns, sco quai ch'il chanzlist Reto Jörger di.
Grevs temps
Cun la vendita da l'hotel Therme l'onn 2012 a l'investider Remo Stoffel, haja in temp grev entschet per el sin chanzlia da Val. La polemica ch’è vegnida fatga e las reproschas da illoialitad e corrupziun fin tar ils cas davant dretgira hajan influenzà bravamain la lavur sin chanzlia.
Ils bels temps èn dentant puspè turnads cun la realisaziun da la halla polivalenta e cun la nova finanziaziun turistica ch'ha la finala era sanà las pendicularas.