Siglir tar il cuntegn

Header

cuntegn

Surselva 5 milliuns per la via tras Trun

Quest project chantunal da sanar la via vegn gist d’engrà a la vischnanca da Trun. Ensemen cun il chantun vegnan fatgas differentas sanaziuns enturn e sut la via.

La vischnanca da Trun vul nizzegiar il fatg che la via chantunala vegn sanada e gist sezza far pliras sanaziuns. Ella prevesa lavurs vid la chanalisaziun, vid l'illuminaziun dal vitg che vegn remplazzada cun in sistem modern, e sco part principala vegnan tut ils passapes tras il vitg sanads e per part fatgs novs.

audio
Mezdi: La via principala a Trun daventa bainprest in plazzal
ord Actualitad dals 17.03.2016.
laschar ir. Durada: 3 minutas 23 Secundas.

Puncts privlus

Insatge che mintgin ha gia vis cun passar tras Trun è la stretga tranter il hotel Tödi ed il hotel Cruna. Ils peduns ston guntgir sin via perquai ch'il passape finescha simplamain avant ina paraid-chasa. La medema situaziun in tochet pli anora, là èsi la chasa Vincenz che serra giu il passape. Gist da questas situaziuns vul ins uss meglierar, di Dumeni Tomaschett, il president da vischnanca da Trun. La schliaziun che la vischnanca propona è da construir duas arcadas atras duas chasas. Per meglierar la situaziun dals peduns vegn era planisà in passape davent da la staziun da viafier fin la scolai da la vart nua ch'i ha fin ussa nagin passape.

Nova entrada en il vitg

Il proxim punct è l’entrada en il vitg da la vart dal museum Cuort Ligia Grischa. L'entrada dal museum è quasi sin via principala. Tar occurrenzas en il museum datti adina puspè situaziuns privlusas per peduns. Meglierar quai munta da spustar la via intgins meters vers il parcadi existent. Quai è dentant in project che vegn realisà pir en la terza etappa da la sanaziun da la via atras il vitg da Trun.

Chantun e vischnanca investeschan radund 5 milliuns francs en la via tras Trun. La vischnanca ha da pajar 1,6 milliuns, quest credit ha il cussegl da vischnanca gia concedì. Il suveran da Trun sto anc decider a l’urna ils 18 d’avrigl sur da quest credit. In gea muntass che las lavurs cumenzassan gia questa primavaira.

Artitgels legids il pli savens