Siglir tar il cuntegn

Header

audio
50 onns Sport Beat: l'istorgia
Or da Actualitad dals 31.10.2022.
laschar ir. Durada: 5 minutas 16 Secundas.
cuntegn

50 onns Sport Beat Tut ha cumenzà a Breil

Sport Beat festivescha ses giubileum da 50 onns. Quai ch'ha cumenzà sco butietta en in tschaler a Breil è daventà in'istorgia da succes. Mintga cumenzament è grev ed era inqual crap è vegnì mess en via. Ma Beat Livers ha gì ina visiun, lezza giada l'onn 1972, cu il turissem ha cumenzà a prosperar.

Igl è stà il cumenzament dals onns 70 cura ch'il turissem d'enviern ha cumenzà a prosperar. Las pendicularas Péz d'Artgas en la regiun da Breil-Vuorz-Andiast han cumenzà cun il manaschi l'onn 1972. Ed il medem onn ha Beat Livers, sco giuvenot da 23 onns, gì l'idea d'installar sin be 18 meters quadrat, en il tschaler da la chasa paterna a Breil, ina butia cun il num Sport Beat. Oriundamain era tut pensà da restar pitschen, ina butia da sport per indigens e giasts, raquinta Beat Livers. El sez lavurava lura anc en la Bassa. A chasa eri la famiglia, surtut sia mamma Franzisca en la vendita e ses frar Remigi cun il ressort skis, chalzers e service. In dir, ma in bel temp, sa regorda Beat Livers.

video
Or da l'archiv: Il 'museum' da skis da Beat Livers
Or da Telesguard dals 23.12.2016.
laschar ir. Durada: 3 minutas.

Cuntinuaziun a Flem

Gia suenter l'emprim enviern ha Beat Livers dà si sia lavur en la Bassa ed è turnà en la patria. Lura ha el cumenzà a bajegiar si per propi sia fatschenta da sport. Il success da l'interprendider giuven n'ha dentant betg plaschì a tuts. Ina ulteriura fatschenta da sport è s'installada a Breil. Tge ch'ha sfurzà da tschertgar alternativas. Gia l'onn 1976 ha el avert ina butia a Flem. Era là ha Sport Beat gì success e vegnì pli grond. E creschida è la fatschenta da sport era a Breil. Nua ch'ins ha fatg a moda originala, or dal clavà da la chasa paterna, la butia. Dentant dat Sport Beat lavur a 30 persunas. I haja duvrà in pau curaschi, era in zic chapital, ma surtut l'engaschi ed il sustegn da la famiglia, punctuescha Beat Livers guardont enavos. El ha dentant 73 onns. Cura ch'el ha cuntanschì la vegliadetgna da pensiun, ha el surdà si'ovra da vita a la proxima generaziun, a ses figl Gian Claudio.

audio
50 onns Sport Beat: invenziuns
ord Actualitad dals 31.10.2022. Maletg: RTR
laschar ir. Durada: 3 minutas 26 Secundas.

L'emprim ski rumantsch

Ils onns 90 ha Beat Livers gì l'idea da far in ski rumantsch. El è vegnì da persvader la fabrica da skis Streule a Schlieren. Lezza ha prendì in da ses top models da skis e creà l'emprim ski rumantsch. Il ski «Steilalva». Da quai da 1'000 exemplars l'onn èn vegnids producids sur plirs onns. La firma Streule na datti gia blers onns betg pli. Il ski «Steilalva» ha dentant era ses plaz en il museum da skis che Beat Livers ha endrizzà a Flem. In museum che mussa la fascinaziun ed era l'istorgia dal sport da skis.

RTR actualitad 18:00

Artitgels legids il pli savens