In mais senza sulegl – uschia è quai mintg'enviern a Cumpadials. Per tuttina procurar per muments da splendur, èn las duas manadras da la chasa d'attempads Casa Sogn Giusep daventadas creativas. Ensemen cun l'artist catalan «Muma» – che viva e lavura en la Svizra franzosa ed è enconuschent per ses art cun chandailas – han ellas organisà in'installaziun d'art sin la terrassa da la chasa.
Ensemen cun voluntaris e voluntarias, ma surtut er cun las cussadentas ed ils cussadents, han els creà ina sort artg che consista da 700 chandailas. Da far art cun fieu munta per l'artist en il medem mument er adina da far art cun glieud. Perquai ch'il fieu ha gia dapi l'entschatta (damai gia tar noss antenats) creà in senn da communitad.
Il titel da l'acziun «Ritardando» metta – sco il ritardando en la musica – en il center, da vegnir plaun plaunet pli plaun ed uschia tancar energia per esser pront per la primavaira.