Votantas e votants da Medel han approvà il contract en dretg da bajegiar. Medemamain han els concedì 200’000 francs ord la reserva da la Tgasa Sontgaclau vid ils custs d’investiziun. Igl è previs da far ord questa chasa in hotel cun mesa pensiun che ha plaz per 40 fin 50 persunas. I vegn calculau cun custs da 1,5 -1,7 milliuns francs.
Quint communal 2015 cun gudogn
Plinavant ha la radunanza da vischnanca approvà il quint communal 2015. Quel serra cun entradas da passa 4'600'000 francs ed expensas da passa 4'440'000 francs cun in gudogn da 160'000 francs. Il cash-flow importa 820'000 francs.
En il quint d'investiziuns èn previdas investiziuns nettas per la vischnanca da passa 660'000 francs.
Gudogn era per l'Ovra electrica Medel
Il quint da l'Ovra electrica Medel serra cun in gudogn da quasi 26'000 francs. Il quint da l'Uniun da cura e traffic Medel ha in deficit da 12'000 francs.
E la finala ha la radunanza communala concedì in credit da 140'000 francs per realisar ina abitaziun en las anteriuras localitads da la scolina a Curaglia.
RR novitads 08:00