Meglras cundiziuns n'avess ins betg pudì empustar tar Son Peder per il derbi da ballape tranter Trun/Rabius e Schluein Glion: Il termometer annunzia passa 20 grads ed il sulegl fustg ha guardà ch'i na vegnia betg memia chaud sin la plazza da ballape Pustget a Trun. La bun'aura ha era carmalà natiers las aspectaturas ed ils aspectaturs.
Enturn 500 persunas èn sa radunadas la dumengia a l'ur da la plazza per passentar in bun mument. L'in vegn pervia ch'il gieu è tradiziun a Trun, in'autra vegn a guardar il gieu perquai che l'ami gioga en la squadra dal CB Trun/Rabius. Ed in auter vegn giu da Mustér, perquai ch'i na dat betg pli in club da ballape là. Pervia da quai giogan plirs giugaders da Mustér en omaduas equipas. I dat anc bleras autras raschuns da guardar il gieu.
La curva dal kiosc ed ils «ultras» da l'US Schluein Glion
Ils giugaders da Schluein Glion han gì sustegn da lur pli fervents fans, ils ultras da USSI. Cun pauca, bandieras e megafon han els fatg crampol per lur equipa. Suenter il gieu han ils ultras ed il giugaders giubilà ensemen.
La basa dals aderents dal CB Trun/Rabius sa chatta tar il kiosc dal club. Ils ins miran il gieu giu dals bancs, tschels èn in pèr meters vi vart en vischinanza da las sustas da l'equipa. Las liongias da brassar e la biera na dastgan betg mancar.
La manadra dal kiosc sa prepara sin la fulla d'aspectaturs
La dumengia dal derbi na vai betg mo per puncts, mabain per la liongia (da brassar) dal ballape sursilvan. RTR è gia in pèr dis avant quest derbi stà a visitar Anita Giger, la manadra dal kiosc da la plazza da ballape a Trun. Ella ha bler da far.
Cura ch'ins entra en il bajetg cun kiosc sper la plazza da ballape Pustget a Trun, èsi fraid ed i savura d'enviern. Suenter la stagiun fraida avra Anita Giger la porta ed ils barcuns per sa preparar sin l'emprim gieu da la primavaira. Anc hai material dals ballapedists en la stiva davos il kiosc. Fin ch'il club n'ha betg fatg ses di da lavur cumina na cumenza Anita Giger betg a schubregiar. Sco emprim controllescha ella las schelenteras e frestgeras. Quellas ston funcziunar avant ch'ella emposta las bavrondas e victualias. Ina schelentera ha in zic bregia da sa dasdar, Anita Giger va vidlonder cun in tirastruvas, la trucca prenda puspè chatsch. I saja da far dal tut, uschia la manadra dal kiosc.
Jau stoss guardar ch'i sfradentia avunda las bavrondas, uschiglio vegn ditg: Questa biera n'è betg fraida.
En ils proxim dis emposta la manadra dal kiosc las bavrondas tar la fatschenta ch'è gist sper la plazza da ballape. Avant mintga gieu ston las frestgeras cun las bavrondas esser plainas e las buts cun la biera esser semtgadas, uschiglio pudessi dar schuschuris.
Reconuschientscha da giugaders ed aspectaturs
Anita Giger maina gugent il kiosc sper la plazza da ballape. I dettia bler da far, quai era durant ils gieus. Lura survegn ella sustegn da sia sora Giulita e sia figlia Petra. Las biadias Amélie e Vera sa gidan er en il kiosc. Las dunnas servan las bavrondas, liongias e snacks or da las duas fanestras dal kiosc.
I vegn renconuschì: aspectaturs sco era giugaders èn engraziaivels e stiman ch'igl ha qua in kiosc.
Dals gieus vesa la manadra dal kiosc tant sco nagut, cunquai ch'ella lavura. Ma ella ha plaschair per tut quels che dattan gugent ballape. Natiralmain spera ella che l'atgna equipa gudogna. In di da gieu en il kiosc passa svelt. La manadra è ina da las davosas che serra la porta suenter la dumengia da gieu.
