Sche tut va tenor il giavisch da la suprastanza communala da Falera, alura duess il nov sistem vegnir introducì gia sin l'entschatta da l'onn 2023. Igl è previs che la direcziun consista da trais persunas: Il president u la presidenta communala, il manader da l'administraziun ed il responsabel per l'infrastructura. La plazza per il responsabel d'infrastructura sto anc vegnir creada e duai lura cumpigliar l'uffizi da bajegiar.
Per pudair introducir il model da direcziun dovri ina revisiun da la constituziun communala. Quella duai vegnir preschentada en il decurs da l'atun a la radunanza communala per laschar decider. Sche tut va tenor plan pudess il president communal Wendelin Casutt anc introducir il nov sistem da direcziun avant ch'el dat giu il post da president la stad 2023, pervi da la limitaziun da temp da l'uffizi. La nova presidenta u president da Falera pudess uschia cumenzar il presidi senza stuair sa fatschentar cun ina midada dal sistem politic.
