A Trun vegn per l'emprima giada fatg naiv per la loipa

Per l'emprima giada è vegnì fatg naiv per il tschancun da loipa da Surrein a Trun. Uschia po quai tschancun gia vegnir avert ussa e na betg sco ils ultims onns pir il schaner suenter ch'i ha dà avunda naiv.

Laschar ir video «La loipa da Trun vegn fatga per l'emprima giada cun naiv tecnica»

La loipa da Trun vegn fatga per l'emprima giada cun naiv tecnica

2:21 min, Telesguard dals 7.12.2017

Ils ultims trais onns èsi stà pussaivel pir davent dal schaner da far passlung tranter Tun e Surrein. Per ch'ils passlunghists na tschertgian betg in auter lieu da far lur sport, han las vischnancas da Trun e Sumvitg, sco era Nordic Surselva ed il club da Skis da Trun decidì dad ennavar quest tschancun. Ils custs da 45'000 francs vegnan repartids tranter ils partenaris.

Ils ultims dis èn las cundiziuns stadas idealas per pudair far naiv en il plaun giusut Trun. La naiv ch'ils dus chanuns produceschan, sto anc vegnir manizzada cun il taglianaiv e silsuenter transportada cun camiuns sin la loipa. Var 5'000 meters cubic naiv dovri per il tschancun tranter Trun e Surrein, per ina stresa da 30 centimeters grossezza e 3 fin 4 meters ladezza, per lura pudair far passlung lasur. Sch'i funcziuna tut bain e sch'i resta fraid po la loipa da 4,5 km lunghezza vegnir averta en il decurs da l'autra emna.

RR Telesguard 17:40