A Val vegn schliada la zona da planisaziun – co enavant?

La zona da planisaziun a Val Son Pieder era vegnida introducida per proteger ils interess da la 7132 SA. Planisà era oriundamain da construir in parc cun l'architect giapunais Tadao Ando.

L'entira prada «Im Boda» dasper il Rain da Val. Avrir maletg en lightbox.

Legenda da maletgs: «Im Boda» qua vegniss alura il parc da Tadao Ando. RTR, Linus Livers

La fin 2013 era vegnida introducida ina zona da planisaziun a Val. Cumpiglia en quella zona era il territori «Im Boda». Quai è la planira che va dal Hotel Rovenda fin en il vitg da Val. Ina tala zona da planisaziun munta atgnamain in scumond da bajegiar. Cun furmar la zona da planisaziun vuleva la vischnanca segirar per la 7132 SA e per la vischnanca il plaz per bajegiar per la halla polivalenta.

La zona da planisaziun era vegnida terminada sin dus onns ed pli tard era quest termin vegni prolungà per ulteriurs dus onns. Entaifer quest temp n'è dentant nagut vegnì realisà en questa zona da planisaziun. Cun quai che la halla polivalenta vegn uss construida en in auter lieu è la zona da planisaziun vegnida schliada, argumentescha la vischnanca la decisiun.

Parc periclità

Il model dal parc planisà da Tadao Ando a Val. Avrir maletg en lightbox.

Legenda da maletgs: Il model dal parc planisà da Tadao Ando a Val. mad

Uschia paran ils plans per in parc dal architect giapunais Tadao Ando en questa zona da planisaziun d'esser giud maisa. Tenor Stefan Schmid il president da vischnanca da Val Son Pieder èsi era vinavant pussaivel da realisar il parc da Tadao Ando. Perquai che la 7132 SA posseda la gronda part dal territori «Im Boda». I dovria dentant anc ina revisiun dal plan da zonas avant ch'in parc possia vegnir realisà. Sche quai vegniss tar ina tala revisun alura pudess era vegnir barattà sulom uschia che la 7132 SA pudess tuttina realisar il parc. La 7132 SA ha ditg sin dumonda ch'els sajan en discussiun e tschertgian soluziuns adattadas.

RR actualitad 07:00