Avant passa dus onns han els bandunà Sagogn e Siat, lur patrias en Surselva, ed èn sa chasads a Sevilla en Spagna. Dapi 1 onn èn Gaby e Guido Candrian-Casanova geniturs da las schumellinas Selina e Lara. En la chapitala da l'Andalusia lavura Guido tar l'assicuranza Helvetia. Dapi passa 6 emnas uss en il homeoffice. Las mesiras da sortir en Spagna èn strictas e vegnan controlladas da la polizia e dal militar.
Nus spetgain vess da puspè pudair ir sco famiglia giuadora.
Dapi paucs dis dastgan ils uffants puspè ir giuadora. Accumpagnads da bab u mamma. Quai dentant be per in'ura e be en in radius dad in kilometer. La giuvna famiglia sursilvana a Sevilla spetga vess da puspè pudair sa muventar in pau pli liber e surtut ensemen e che las schumellinas pon puspè far termagls en il parc cun auters uffants.
La Spagna tutga tar ils pajais dal mund ch'èn tutgads il pli ferm da la pandemia da corona (200'000 persunas infectadas e 24'000 persunas mortas; stan 29 d'avrigl). La regenza vul cun in plan da 4 fasas schluccar las restricziuns a partir dals 4 da matg. La finamira è, da pudair turnar tar la normalitad la fin da zercladur.
Ils plans da Gaby e Guido Candrian-Casanova da visitar questa stad lur famiglias en Surselva èn il mument intscherts.