Siglir tar il cuntegn

Header

Tgesa S. Vigeli
Legenda: Ord la chasa da tgira S. Vigeli duai quai dar abitaziuns per seniors. RTR, G. Hosang
cuntegn

Surselva Abitaziuns per seniors en Tgesa S. Vigeli

Ina iniziativa pretenda ch’i vegnia examinà la midada da la chasa da tgira S. Vigeli a Sedrun en abitaziun per seniors.

L’iniziant Peter Hüssy n’è betg cunter ils plans da la fundaziun Puntreis che planisescha ina residenza da seniors a Sedrun. «Nus avain gia bajetgs existents ch’èn qua en la val. Uschia per exempel la chasa S. Vigeli ch’è anc en in bun stan» di Peter Hüssy. Cler ch’i saja era d’investir en quest bajetg, dentant betg tant sco en in nov manegia el. Perquai ha el inoltrà ina iniziativa ch’è vegnida suttascritta da 203 persunas.

L'iniziativa pretenda ch'i dettia ina gruppa da lavur cun represchentants da la populaziun ch’examineschi la pussaivladad da far ord la Tgesa S. Vigeli aabitaziuns per l’abitar a moda assistida. Latiers duai quai dar las purschidas ed il servetschs ch'i dovra. Uschia pudess ins era mantegnair plazzas da lavur en vischnanca, declera Peter Hüssy.

La fundaziun Puntreis è actualmain londervi da planisar a Sedrun en in auter lieu ina residenza per seniors. Las lavurs giajan en il mument vinavant, di il president dal cussegl d’administraziun da la fundaziun Puntreis, Clemens Berther. Ils plans per la residenza sajan semtgads ed en curt sappian ins era con ch’i vegnia a custar. Per pudair bajegiar la residenza dovra la fundaziun era in credit da la vischnanca da Tujetsch ed uschia spetgia Clemens Berther da survegnir da la vischnanca l’infurmaziun sche la situaziun avess da sa midar ed en tge direcziun ch’i duai ir.

Il proxim pass vegn ad esser l'elecziun d'ina cumissiun. Sco il chanzlist communal Lucas Collenberg ha ditg, vegni quella elegida en il proxim cussegl da vischnanca dals 23 da mars.

Artitgels legids il pli savens

Scrollar a sanestra Scrollar a dretga