Siglir tar il cuntegn
Inhalt

Surselva Acceptà la svalitaziun da las aczias per 90%

La radunanza generala d'acziunaris da las Pendicularas Breil Vuorz Andiast SA ha acceptà oz a Breil da svalitar las aczias per 90% ed auzar il chapital d’aczias per 3 milliuns.

Acziunaris da las Pendicularas Breil Vuorz Andiast SA alla radunanza generala d'acziunaris a Breil.
Legenda: Acziunaris acceptan la svalitaziun da lur aczias per 90%. RTR, G. Hosang

Sco igl è vegnì orientà ils acziunaris saja quai la suletta varianta per sanar la bilantscha ed uschia salvar las pendicularas dad in eventual concurs. Laschar plimas ston dentant betg mo ils acziunaris. Era las bancas desistan sin rodund 6 milliuns francs.

La decisiun è vegnida prendida senza grondas discussiuns, quai che dat satisfacziun al president dal cussegl d'administraziun da las pendicularas Marcel Friberg.

Cun pitschnas excepziuns ha l’entir acziunariat vis che quai è ina buna via, ed ha sustegnì questa cumplainamain.
Autur: Marcel FribergPresident Pendicularas Breil/Vuorz/Andiast

Holding vegn cun nov chapital

Ils 3 milliuns nov chapital vegnan entras 10 fin 12 investiders che furman la «Anavon Holding». La holding ha uschia la finala 90.8% da las aczias da las Pendicularas Breil Vuorz Andiast SA. Tut ils nums dals 10 fin 12 investiders n’èn betg enconuschents.

Ressort Pradas è la gronda speranza

La sanaziun da la bilantscha na tanscha dentant betg per che las pendicularas hajan success. I dovra novs giasts sin las pistas e perquai vegn mess gronda speranza sin il Ressort Pradas che avra sias portas il december. Las speranzas èn tenor Marcel Friberg giustifitgadas. «Nus vesain che nus pudain avrir ils 26 da december il ressort cun ina fitg, fitg auta occupaziun». Marcel Friberg è persvas che quests ressorts da famiglias hajan success. Quai saja era sa mussà en auters lieus.

Cussegl d'administraziun: Damian Sac, Pierin Vincenz, Marcel Friberg, Hansueli Baier e Richard Caduff
Legenda: Cussegl d'administraziun: Damian Sac, Pierin Vincenz, Marcel Friberg, Hansueli Baier e Richard Caduff ANR, A. Beeli

Midadas en il cussegl d’administraziun

Marcel Friberg resta sin giavisch dals novs investiders vinavant president dal cussegl d’administraziun. Da nov èn Pierin Vincenz, Richard Caduff e Damian Sac vegnids elegids en quest cussegl. Els remplazzan Anita Vogel, Luzi Pfister e Guido Sgier.