Davent da questa stagiun d'enviern è l'access sin il territori Andermatt-Sedrun-Mustér limità per la clientella dal Skipass Surselva sin set dis, e quai tar in lev augment da pretsch. Ditg cun auters pleds: La clientella survegn purschì pli pauc e sto pajar dapli. Cunquai che las pendicularas dad Andermatt-Sedrun-Mustér han auzà ils pretschs, è l'abunament annual da la destinaziun da skis pli char ch'il Surselva Skipass. Uschia han las Pendicularas Surselva decidì da limitar l'access tar questa destinaziun per betg stuair augmentar il pretsch considerablamain. Quai ha Pascal Schär, il manader dal marketing d'Andermatt-Sedrun-Mustér, communitgà envers RTR.
Skiunzas e skiunzs che na survegnian betg reducziuns perquai ch'ellas n'abiteschan betg en ina vischnanca da quels territoris da skis, tiran la curta. Savens è questa glieud da vitgs sco Trun e Sumvitg.
Livio Janka, che cumpra dapi passa 15 onns il Skipass Surselva, n'è betg cuntent cun la decisiun da las Pendicularas Surselva. El ha scrit ina brev da lecturs en la gasetta ed ha gist proponì vias da far il Skipass Surselva pli attractiv. El manegia ch'i fiss or da sia vista meglier da pajar dapli per pudair giudair la purschida da tut las pendicularas senza limitas. Che quest n'è betg la schliaziun per glieud cun in budget pli pitschen è el conscient. In pass nua ch'ins savess eleger ils territoris ch'ins vul ir cun skis, fiss in'autra schliaziun, tenor el.
Jau hai emprovà passa 10 giadas da telefonar a las pendicularas d'Andermatt-Sedrun-Mustér enfin ch'insatge ha ina giada prendì giu.
Las limitas n'han betg mo procurà tar Livio Janka per displaschair. Tenor el haja el gì in grond resun or da la populaziun. E quai na betg mo da «fanatichers» da skis, uschia l'um da Trun. Plinavant è cumparida en la gasetta dad oz er ina brev averta davart la problematica.
Nus na vulain betg ans focussar sin purschidas exclusivas. La dumonda è plitost, tge ch'è la meglierà proporziun tranter pretsch e prestaziun.
Gugent avess RTR dumandà Markus Good, il president da las Pendicularas Surselva, sch'ellas veglian sutterrar il product Skipass Surselva. E sch'ellas na vegnian betg a crear in product communabel pli attractiv e tge che las pendicularas veglian dir a la clientella da tschep dal Surselva Skipass. Deplorablamain n'ha Markus Good betg chattà il temp per in'intervista.
