La via da quartier per il territori abità ad Acla da Fontauna maina tras l'areal previs per la surbajegiada da l'hotel nov sco era d'abitaziuns administradas e secundaras. Per quest motiv sto ella vegnir spustada. Da nov duai quella via manar a sanestra da la parcella da l'hotel directamain davent da la via chantunala siadora. Mesemna èn las lavurs per quella via vegnidas lantschadas uffizialmain.
Las lavurs vegnan a durar enfin mez december 2025.
Decisiuns strategicas
La via sco tala è en quest senn in'obligaziun da l'Immo Invest Partner SA. Ella sto garantir l'access al quartier cun chasas d'abitar ad Acla da Fontauna, damai che la via existenta na vegn betg a star a disposiziun a quel en l'avegnir. En quest senn è quella colliaziun mo ina part fitg marginala dal project, ma necessaria per surbajegiar l'areal.
Cun las lavurs vi da la surbajegiada vegnin nus ad entschaiver la primavaira/stad 2026.
Cura che la surbajegiada vegn ad esser terminada n'è anc betg dal tut cler. Ins quinta che la construcziun saja pronta per la fin da l'onn 2027 u il cumenzament da l'onn 2028. «Il termin communitgain nus il cumenzament da l'onn proxim», di il manader da project vinavant.
Anc adina cun Mövenpick
Ch'il project da la surbajegiada è sa retardà dapi che la populaziun ha prendì uffizialmain cumià dal bajetg vegl l'avust 2023 ha plirs motivs. La procedura per tuttas lubientschas per realisar la surbajegiada è s'extendida enfin viaden en l'avrigl 2025. Dapi lura lavura l'Immo Invest Partner SA vi dals davos detagls da la planisaziun. Tenor Fredy Ganz pretendan las lavurs actualas era decisiuns strategicas che basegnan temp e pazienza. Da tge decisiuns strategicas ch'i sa tracta n'ha el betg vulì tradir.
Midà n'è dentant nagut vi da la cunvegna cun Mövenpick che affittescha l'hotel suenter la construcziun.
Mövenpick è ina chadaina d'hotels che maina lura era il nov hotel a Mustér.
Spazzà l'onn 2024
Ils 26 d'avust 2023 ha la populaziun fatg festa sin l'areal dal hotel Acla da Fontauna a Mustér. Ella ha prendì cumià dal bajetg vegl e beneventà il project nov da l'Immo Invest Partner SA. Lura è vegnì dà il signal da partenza per las lavurs da spazzar il bajetg erigì avant bunamain 50 onns. En in'emprima fasa è i stà indispensabel d'allontanar substanzas nuschaivlas d'asbest e PCB en l'intern dal bajetg. Quellas lavurs èn vegnidas terminadas la fin 2023. L'emprima mesadad da 2024 è il bajetg alura vegnì spazzà. Perditga dal hotel dat dapi bunamain in onn in mantun betun manizzà. Questa primavaira èn las plantas en il curtgin da l'hotel alura vegnidas runcadas. Quella runcada è stada necessaria tranter auter per che la via da quartier nova a Sax possia vegnir realisada.