Il dumber da 40 uffants e giuvenils che prendan part ad ina concurrenza d'acrobatica mussa che quest sport è tschertgà. Entschavì per propi cun l'instrucziun d'acrobatica ha Anja Klittich Berther da Mustér ch'è sezza stada acrobata da renum en Germania. Ed avant paucs onns ha ella survegnì il sustegn da Mikhail Semenov ch'è – suenter che la guerra en l'Ucraina è rutta ora – fugì en Surselva cun sia famiglia ed è vegnì animà en la Cadi d'entschaiver sco trenader d'acrobatica. El ha era menà la concurrenza d'acrobatica a Glion la davosa sonda ensemen cun Maria Dunst da la Scola da circus Surselva e cun Maycon Duff da Mustér.
Circus ed acrobatica
La clownessa Maria Dunst che ha inizià e che maina la Scola da circus Surselva ha ditg envers la FMR che l'acrobatica saja ina cumponenta impurtanta da mintga scola da circus. La concurrenza d'acrobatica che haja lieu per la terza giada a Glion saja vegnida iniziada dal trenader Mikhail Semenov: «Mikhail è in cass da cletg per la Surselva e perquai vulain nus dar il support necessari ad el.»
Maria Dunst ha tratg ina bilantscha positiva da la terza concurrenza d'acrobatica. «A mai fa surstar, quant disciplinads ch'ils uffants èn e co els sa preparan mintgamai sin lur cumbats sportivs sin il tarpun d'acrobatica.» Mikhail Semenov saja in strentg scolast d'acrobatica, ma el possia entusiasmar e saja ina persuna da bun cor, ha ella manegià.
«Ins senta ch'ils uffants han fitg gugent el.» Per ella saja stà era bel che tants geniturs hajan prendì part sco publicum a la concurrenza. Quai saja la meglra motivaziun per ils uffants. La clownessa è oriunda da l'Austria, viva a Sagogn ed ha in agen atelier da scolaziun per clowns a Schluein en il chastè Löwenberg.
Bellas prestaziuns
Il trenader Mikhail Semenov ha manegià che sia finamira sportiva saja da cuntanscher entgins buns resultats u schizunt da gudagnar medaglias al proxim campiunadi svizzer d'acrobatica che ha lieu mez zercladur a Winterthur. «Jau stoi dir ch'ils uffants e giuvenils han fatg in bun progress ed èn cuntents. Ed ils geniturs èn era cuntents.» I saja bel da pudair porscher era anc in auter sport en Surselva sper ir cun skis, dar ballapè e giugar unihockey, ha il trenader ditg. Sper il campiunadi svizzer sa legra el era fitg dal segund campiunadi grischun d'acrobatica che ha lieu ils 21 ed ils 22 da november a Mustér. «Per atletas ed atlets è il campiunadi grischun ina pussaivladad optimala da sa mesirar.»
I va vinavant
Las concurrenzas d'acrobatica da la Scola da circus Surselva a Glion duain avair lieu era en il futur. Las proximas èn l'atun 2026 e puspè la primavaira 2027. La manadra da la scola Maria Dunst ha ditg che l'acrobatica saja in grond sustegn per sia Scola da circus Surselva. Entaifer quella dettia gia ina gronda purschida d'activitads. «Jau vegn strusch da far tut quai che jau faschess gugent. Jau ma legrel ussa fitg sin l'occurrenza finala da la scola che ha lieu en duas emnas a Sagogn.» La Scola da circus Surselva è vegnida iniziada l'onn 2023 e fundada in onn pli tard (guarda box).