Als acziunaris plascha l’ustaria ch’è vegnida renovada. Renovà è vegnida l’entira cuschina ed il buffet d’autoservetsch. Dasperas datti da nov ina ustaria cun ina bellezza survista sin ils culms. En questa ustaria cun bler lain e plaz per 70 persunas, vegn servì. Ina purschida che mancava tenor l’acziunari principal Marcus Weber anc en il territori da skis da Mustér. Era el è cuntent cun il resultat: «Igl è vegnì sco quai che nus avain giavischà».
Auzament cundiziunà dal chapital d’aczias
Ils acziunaris han reelegì Marcus Weber, Vincent Augustin, Paul Christen, Martin Kreiliger e Francestg Cajacob en il cussegl d’administraziun. Il president dal cussegl d’administraziun Heinz Schumacher ed il vicepresident Thomas Bieger n’èn betg stads a disposiziun vinavant per il cussegl d’administraziun.
President è da nov Marcus Weber e vicepresident è Vincent Augustin. La radunanza generala extraordinaria ch’è stada avant la radunanza ordinaria, ha decidì ch’il chapital d’aczias po vegnir auzà aifer ils proxims dus onns per var 2,8 milliuns. Quai dovri per uschia savair realisar la colliaziun da Sedrun en il territori da skis da Mustér. Vinavant è vegni decidi da midar las aczias al purtader sin aczias nominalas.
