Sin la brev averta dal prim d’avust da Reto Gurtner tematisada en La Quotidiana dals 12 d’avust ha il president communal da Flem, Adrian Steiger, formulà ina resposta betg drizzada be a Reto Gurtner, mabain als medems adressats che han survegnì la brev averta dal schef da la Arena Alva SA. Ella replica punctuescha Adrian Steiger sia opiniun che Reto Gurtner haja surpassà la sauna raschun, principalmain là nua ch’el crititgeschia la contribuziun da la «Tagesschau».
Ina contribuziun che ha tematisà la fulla da glieud che garegia access al Lag la Cauma. Ina emissiun nua che Adrian Steiger vegn a pled. «Principalmein na vuless jeu cun mia preschientscha en la contribuziun betg vegnir cumpareglià cun in Trump u in Bolsonaro.» Gurtner ha tranter auter gì valità l’emissiun cun ils pleds: «Per ina preschientscha mediala enconuschenta ad el sulet nà dad ina Trump u Bolsonaro.»
Las explicaziuns dal president american sco dal president da la Brasilia èn tant enconuschentas sco disfamantas. Vinavant fa Adrian Steiger attent, ch’il commentari en la emissiun cun la pretensiun che l’Arena Alva SA incasseschia il gudogn na derivia betg da sia vart. «Jau sun anc adina da l'opiniun ch’il tschains tranter las duas partidas è equilibrà.» L’Arena Alva SA ha prendì a fit il manaschi dal Lag la Cauma da la vischnanca da Flem.
Stà necessari da serrar
Adrian Steiger defenda la serrada da l'access al Lag la Cauma da la primavaira en connex cun las mesiras decretadas da la Confederaziun per impedir l’infecziun da corona. «Tenor las premissas legalas èsi stà indispensabel da serrar il Lag la Cauma.» Instradar las mesiras da la Confederaziun valitescha il president communal da Flem per incumbensa operativa da la vischnanca. Ina che saja succedida da cuminanza cun il fittadin dal Lag la Cauma, pia l’Arena Alva SA.
El sez sco president communal sa sentia responsabel che las ordras superiuras vegnian respectadas. Adrian Steiger pledenta en sia brev averta la pretensiun da la vischnanca da contingentar il dumber dad osps dal di al Lag la Cauma a favur dals osps dals hotels e dals possessurs da segundas abitaziuns. Quella mesira saja vegnida ludada da bleras varts. En general è il president communal da Flem da buna speranza che l'istorgia da success da Flem possia vegnir scritta vinavant. «E quai cun tantas persunalitads pussiblas cun ina visiun communabla.»