La «Tanzfabrik» è il sulet lieu a Cuira nua ch'ins po exercitar da far poledance. En la stanza sa chattan otg stangas, il palantschieu è var 3 meters aut. Avunda aut per pudair far da tuttas figuras, di Alexa Cavegn. La dunna da 29 onns ch'abitescha a Vella en Val Lumnezia fa dapi tschintg onns poledance. Ina giada ad emna vegn ella a Cuira per pudair exercitar ensemen cun autras dunnas.
Dapi ch'ella haja accumpagnà ina collega ad ina classa da poledance a Lucerna saja ella stada fascinada:
Quest sport plascha a mai perquai ch'igl è ina buna maschaida da forza, coordinaziun, movibladad e coreografia.
Per ella po poledance avair ina cumponenta erotica, na sto dentant betg. Per ella èsi in sport ch'ella fa per restar ferma e movibla. Commentaris sexistics pervia da ses hobi na haja ella mai survegnì – quai malgrà ch'ella parta era fotografias sin social media che mussan ella a sautar vi da la stanga.
Pauc resti tutga vitiers
Sco che las otg dunnas han fatg lur exercizis per sa stgaudar, vegnan las chautschas lungas barattadas cun chautschas curtas. Suren portan las sautunzas savens be in bh da sport.
Igl è d’avantatg da purtar pauc resti per che la pel po tatgar vi da la stanga. Uschiglio na fissi betg pussibel da far las figuras.
Sper il resti curt è er il magnesium in impurtant gidanter. Cun lez èsi pli simpel da sa tegnair vi da la stanga glischna.
In'autra rumantscha che visita il trenament da gruppa è Lena Camenisch. Far poledance dettia ad ella confidenza. I saja in bel sentiment sch'ins haja dumagnà ina figura greva. Uschia vesian ins tge ch'il corp po prestar.