Siglir tar il cuntegn

Header

cuntegn

Alpegiaziun 2021 Sin il persunal d'alp spetgan grondas sfidas

Bleras alps han sin quest onn stuì tschertgar nov persunal, perquai che la preschientscha dal luf porta novas sfidas. Ed er l'aura fraida dal matg fa quitads.

La stagiun d’alp stat avant porta. L’aura fraida ed ils lufs procuran per rubaglias sin il frunt dals responsabels.

Chattar persunal vegn adina pli difficil

Sco il responsabel dal post da cussegliaziun al Plantahof, Töni Gujan, ha ditg a RTR han bleras alps da nursas stuì tschertgar nov persunal per questa stad. Quai pervia da la preschientscha dals lufs. Cun la derasaziun da quels sin l'entir intschess dal chantun Grischun quinta Gujan, ch'il problem da survegnir persunal per las alps vegn a crescher marcantamain ils proxims onns. Il pensum da lavur ch'è ussa per part gia grond, vegn cun las mesiras da protecziun necessarias anc ina giada augmentà considerablamain. A quest squitsch na vul betg tut il persunal d'alp s'exponer en l'avegnir.

audio
La tschertga da pasturs vegn pli pretensiusa
ord Novitads dals 19.05.2021.
laschar ir. Durada: 52 Secundas.

Ils lufs fan quitads

En il rom dal project «Pasturs voluntaris» scolescha la Pro Natura quest onn enturn 50 gidanters per cas urgents en consequenza da la preschientscha da lufs. Voluntaris duain emprender en in da dus dis da sustegnair pasturs e pasturas d'alp là, nua ch’i dat problems pervi dals lufs. Ord las retschas dal puresser datti en il mument anc ina tscherta sceptica envers l'agid da la Pro Natura. Quai cunzunt, perquai che l'organisaziun per la natira aveva cumbattì la revisiun da la lescha federala da chatscha ed uschia impedì, ch’i fiss vegnì pli simpel da regular las populaziuns dals lufs.

Er er l'aura po esser ina sfida

Suenter ch’il mais avrigl ed uss era il matg èn stads plitost fraids, pudess il cumenzament da la stagiun d’alp sa retardar in pau. Tenor infurmaziun dal Plantahof han las alps bassas, che chargiassan da quest temp, in retard da 3 enfin 7 dis sin la media dals davos onns. Per las alps pli ad aut tanscha il temp anc per pudair chargiar en il rom dals onns passads. Quai dentant sut la cundiziun che las temperaturas vegnan constantamain pli chaudas il proxim temp.

audio
La situaziun actuala sin las alps grischunas
ord Actualitad dals 20.05.2021.
laschar ir. Durada: 4 minutas 56 Secundas.

Ord l'archiv:

RTR actualitad 07:00

Artitgels legids il pli savens