L’Ospital regiunal Surselva na collavura betg pli cun la Furger Taxi SA a Mustér. Quai era vegnì communitgà l’emna passada tras l’ospital a Glion. Suenter lungas contractivas cun l’interpresa a Mustér sajan ins sa cunvegnì d’acceptar la visada dal contract entras Furger Taxi. Co reglar il servetsch d’ambulanza en la Cadi en futur è pia en ils mauns da l'ospital a Glion.
Furger Taxi ha visà ils contracts
Sco Stiafen Furger, commember dal cussegl d’administraziun ha ditg sin dumonda hajan els visà ils contracts per pudair evitar deficits. L’interpresa ha vivì ils ultims onns da las sinergias da transports da taxis ed ambulanza e tras l’engaschi da ses bab Ignaz Furger. Ma l’interprendider vegnia entant 70 onns e veglia uss passar pli curt, di ses figl Stiafen Furger. Il deficit annual da radund 60'000 francs vulevan els laschar garantir, ma las contractivas èn idas a fin senza cunvegna pli. En la communicaziun a las medias scriva Furger Taxi che la purschida nova vegnia segir pli chara e las prestaziuns pli pitschnas.
Purschida vegn organisada da nov
La purschida dal servetsch d’ambulanza sto vegnir organisada da nov tras l’ospital. Ma il post en la Cadi vegnia segir era mantegnì en avegnir. Il mument sajan ins en contractivas co organisar tut, quellas sajan gia avanzadas, di la manadra da l'Ospital regiunal Surselva Claudia Käch. Era hajan ins discurrì cun ils medis en la regiun, ch’han da prestar il servetsch d’urgenza medicinal, ed il resun saja che las propostas sajan realisablas. Sin il pli tard la fin da mars duai la proposta esser sin maisa e lura possian ins dir quant ch’il servetsch custa e co quel vesa ora, di Käch.
Furger Taxi fa reproschas davart communicaziun
L’interpresa da transport fa uss attent en in scriver a las medias ch’ella na saja betg cuntenta cun l’agir da communicaziun tras l’ospital. Uschia saja vegnì communitgà la disditga da las contractivas il medem di al manaschi ed a las medias, uschia che plirs collavuraturs hajan survegnì l’infurmaziun tras las medias e betg dal patrun da lavur. L’ospital na vul betg commentar la moda e maniera da communicaziun. Ma la directura Claudia Käch di che tut ils collavuraturs d’ambulanza da l’interpresa Furger Taxi hajan prioritad cura che novas plazzas vegnian occupadas.
RTR actualitad 11:00