Siglir tar il cuntegn
Inhalt

Surselva Anc nagin moviment ad Acla da Fontauna

Il project per in hotel da 4 stailas ad Acla da Fotauna ha il mument retard. Sco la vischnanca da Mustér ha confermà, sajan ins en discussiun cun las differentas partidas. Il mument blochescha dentant la protesta da Helvetia Nostra il project.

Sco la responsabla da Helvetia Nostra, Vera Weber, ha confermà ad RTR, haja ella survegnì avant curt tut las infurmaziuns giavischadas. Els sajan pronts da manar discurs cun ils investiders e quai duai era succeder las proximas emnas, ha ditg Weber. Era ils investiders dal project, la Immo Invest, è il mument en contractivas cun tut las varts, ha confermà il mainaproject Fredy Ganz.

Tuttina na datti nagin moviment

Tuttina era gia previs da cumenzar cun dismetter il bajetg vegl da l'hotel ch’è dapi il 2001 vids. In dals problems è, ch’il bajetg existent cuntegna bler asbest. Las lavurs da construcziun previsas per la primavaira 2019 èn il mument pauc realisticas. Tuttina datti anc speranza che la ruina da l'hotel vegl dals Beltgs pudess vegnir davent a Mustér.

Planisà investiziun da radund 100 milliuns francs

La Immo Invest Partenaris SA da Glattbrugg vul investar ca. 100 milliuns francs. I duai dar in hotel cun 208 chombras, wellness, ina sala da banchet e garaschas. Davostiers datti 6 bajetgs pli pitschens cun 91 abitaziuns (34 administradas, 57 per vender).

RR novitads 17:00