Siglir tar il cuntegn

Header

Ina bloccada stradala davant ina galaria.
Legenda: La via tranter Göschenen ed Andermatt resta probabel anc serrada intginas emnas. Keystone
cuntegn

Surselva Andermatt n’è betg isolà

La via d’autos tranter Göschenen ed Andermatt ch’è serrada pervi da privel da bovas è in impediment per turists sco era per ils pendularis indigens. Tant la vischnanca sco la destinaziun da turissem lavuran maun en maun per chattar soluziuns.

Sco il Flurin Riedi, il directur d’Andermatt Urserental Tourismus ha ditg a Radiotelevisiun Svizra Rumantscha saja la serrada da la via d’autos tranter Göschenen ed Andermatt in problem per il turissem en la val d’Ursera. Perquai hajan ins immediat stuì prender mesiras. La pli impurtanta saja la communicaziun ha ditg Flurin Riedi. «Andermatt n’è betg isolà», quai saja il messadi ch’i valia ussa da derasar tar ils turists. Via ils pass dal Gottard, Alpsu e Furca, sco era cun la viafier vegnian ins senza problems ad Andermatt. Sco Flurin Riedi ha ditg vinavant hajan ils collavuraturs dal biro da turissem ussa da declerar la situaziun e tge che saja tut pussaivel.

Dapli trens

Sper il turissem èn dentant era ils indigens pertutgads da la serrada da la via. Sco quai ch’il president da vischnanca d’Andermat, Roger Nager ha ditg, stoppian quel u ir cun il tren a la lavur ubain stoppian far in pli lung viadi. Intgins laschian lur auto a Göschenen. Quai è la raschun che Andermatt è en contact cun Göschenen per chattar ina soluziun pertutgant ils parcadis a Göschenen. En contact è la vischnanca tenor Roger Nager era cun la Viafier Matterhorn-Gottard. Cun la viafier veglian ins guardar sch’ins possia laschar cursar cunzunt la saira pli ditg trens tranter Andermatt e Göschenen.

Sco quai che l’Uffizi federal per vias ASTRA ha communitgà vegnia la via probabel a restar serrada anc intgins emnas.

Artitgels legids il pli savens

Scrollar a sanestra Scrollar a dretga