Ina strategia communabla per l'entira regiun. Quai han las trais vischnancas, Andermatt, Tujetsch e Mustér communablamain cun las duas interpresas da pendiculara e las duas organisaziuns turisticas decis da sviluppar. La finamira principala è da coordinar las purschidas a lunga vista, scriva Sedrun Mustér Turissem en ina communicaziun a las medias. Per vegnir da realisar quai è vegnida fundada ina gruppa da lavur ed in gremi strategic. Sco Pascal Schär, responsabel da marketing da l’Andermatt-Sedrun-Mustér SA ha ditg, realiseschian las pendicularas da Mustér il mument ina bobera. Ord quest motiv na vegnia en la regiun turistica betg pli realisà in sumegliant project, mabain nitzzegià las sinergias.
Pagina d’internet e nova app per la destinaziun
Ina mesira a curta vista è d’optimar l’entira purschida online. Uschia han il mument las duas organisaziuns turisticas e las pendicularas differentas paginas d’internet ch’infurmescha ils giasts. L’idea saja da crear ina pagina d’internet communabla nua ch’il giast chatta tut las infurmaziuns e po era nizzegiar quellas optimal, uschia Schär. Plinavant è planisà da crear ina applicaziun da la destinaziun ed era las cartas da giasts che vegnan purschidas da las organisaziuns turisticas duajan en l’avegnir vegnir unifitgadas, declera Pascal Schär.
