Il reschissur Andrea Zogg ha tschentà la scenaria en in mund futur cun computers e cameras. Quai che resta è il cumbat per la libertad. Natiralmain na d'astga era il sajet cun il paliet sin il mail betg mancar.
Il guaffen da Tell è il balester. Ils sbirs da Gessler èn dentant armai cun lantschas futuristicas da lasers. Il reschissur Andrea Zogg ed il dirigent e manader artistic Gion Gieri Tuor han chapì immediat da metter quest tema en in auter temp.
Il Tell modern cumbatta uschia encunter cameras da surveglianza ed encunter computers. El lai per exempel marschar l'entir pievel sper ina camera ora, mintgin vegn identifitgà da quella. La camera remplazza la chapella che Tell n'ha betg vulì salidar. Uschia vul Tell en l'inscenaziun a Sursaissa betg vegnir filmà e quai maina tar il sajet cun il balester.
Il sajet cun il balester è era tema da Rudolf Mirer che ha creà il maletg da tribuna. Uschia sajetta el ses paliet viaden el code binar che consista d'ins e nullas e destruescha uschia ils computers. Cun destruir ils computers svanescha la pussanza da quels da surengiu, ni pia da Gessler.
