Siglir tar il cuntegn
cuntegn

Surselva Approvà dus credits e nov sistem d’infurmaziun

En sia sesida ha il cussegl da vischnanca da Mustér tranter auter approvà dus credits da mintgamai 195’000 francs. Inoltrà duas moziuns e laschà declerar il nov sistem d’infurmaziun.

Dus cussegliers da vischnanca contemplan las tavlas dal nov sistem d'infurmaziun a Mustér.
Legenda: Dus cussegliers da vischnanca contemplan las tavlas dal nov sistem d'infurmaziun a Mustér. RTR, G. Hosang

In credit da 195’000 francs ha il cussegl da vischnanca approvà per la sanaziun da la cuschina da la chasa da scola. Quella è 60 onns veglia e na correspunda betg pli als basegns d’instrucziun actuals. Ils segund credit da 195’000 francs ha il cussegl dà per la cumpart dals custs che la vischnanca ha da pajar per la sanaziun dal tschancun da la Via Lucmagn tranter la Via Gonda e la punt Langini, inclusiv sanaziun da la chanalisaziun e l’illuminaziun publica.

Moziun per sbassar la taglia

Vinavant è vegnì approvà ina moziun per la sanaziun dal plaz scola. Tenor la suprastanza communala vegn quella a succeder, sche tut va sco planisà, ensemen cun la sanaziun da la “scola nova”. In’ulteriura moziun pretenda da terminar il concept da sanaziun da las finanzas communalas e da sbassar il pè da taglia da 120 sin 105% e la taglia sin giaschom dad 1,7 sin 1 promil. Ultra da quai ha il parlament communal approvà ils novs statuts per la Regiun Surselva per mauns a la votaziun dal pievel.

Tavlas d’infurmaziun

Avant il cussegl han las cusseglieras ed ils cussegliers prendì invista da las novas tavlas d’infurmaziun per ils turists che furman il nov sistem d’infurmaziun. Quellas tavlas vegnan successivamain postadas per il vitg enturn. Dapi prest in onn vegn spetgà sin quellas tavlas. Tranter auter perquai ch’igl ha dà problems da furniziun. Il sistem d’infurmaziun consista da pitgas cun inscripziuns che mussan la via tar las differentas attracziun dal vitg e lieus impurtants per turists ubain tavlas cun chartas geograficas per s’orientar.

RR novitads 6:00