Siglir tar il cuntegn

Header

video
La nova chasa Truffer a Val
Or da Telesguard dals 14.06.2022.
laschar ir. Durada: 3 minutas 34 Secundas.
cuntegn

Architectura a Val Nov bajetg da l’architect Kengo Kuma

Il bajetg è per gronda part ord da crap, co pudess quai esser auter tar la famiglia Truffer. Uschia ha l’interpresa Truffer gia plazzà lur crappa da Val sin las pli enconuschentas plazzas da la Svizra, uschia sin la plazza federala a Berna ed era sin il Sechseläutenplatz a Turitg, ed era pliras chasas quasi sin tut ils continents èn vegnidas realisadas cun crappa ord da Val Sogn Pieder.

audio
Famiglia Truffer realisescha in siemi en furma d'in bajetg da Kengo Kuma
ord Actualitad dals 11.06.2022.
laschar ir. Durada: 3 minutas 52 Secundas.

E quai n’è betg l’emprim bajetg realisà da Kengo Kuma a Val, uschia è el stà in dals architects da la renovaziun da l'hotel 7132 dasper la Terma a Val. Tar la chasa da la famiglia Truffer è el dentant stà responsabel per l’entira planisaziun. Cuzzà ha la realisaziun da l’entir bajetg quasi 10 onns, ma ins na possia era betg dir ad in artist, uss fai vinavant, uschia Pius Truffer. Realisar insatge spezial e bel dovria ses temp.

Quasi tut è ord da crap u lain

La chasa ha furmas che regordan vi da las muntognas che circumdeschan Val Sogn Pieder. Uschia è la fatschada quasi dal tut ord da crap cun elements pendents medemamain ord da crap e lain. Ina stgala che traversa l’entir bajetg è la via da las auzadas giudim en l’emprima auzada nua ch’ils biros sa chattan e vinavant en la segunda nua ch’igl ha dà duas abitaziuns. Duvrà ha quai passa 1'000 crappa en in toc e mintgin da quels è singular, ha la famiglia Truffer declerà.

Per els saja stà impurtant da realisar in siemi, in siemi or da crap, perquai hajan els era laschà dal tuttafatg maun liber a Kengo Kuma. Quai haja l’architect giapunais apprezià e saja era stà pliras giadas a Val per guardar la situaziun. Uschia saja la chasa ina part da l’entir e s’integreschia fitg bain en ses conturn, in dals resuns era da las visitadras ed ils visitaders. Quant bler che tut ha custà na possian ins gnanc dir, uschia Pius Truffer, ma l’aspect da marketing na stettia betg en il center, era sche la chasa servia segir sco object da referenza per clientella futura.    

RTR actualitad 17:00

Artitgels legids il pli savens