Siglir tar il cuntegn

Header

cuntegn

Surselva Archiv cultural Foppa e conturn – gia pli che 10'000 documents

Ils emprims dus onns dapi la fundaziun da l'Uniun archiv cultural Foppa e conturn èn stads in success.

Dapi dus onns exista l'Uniun Archiv Cultural Foppa e dapi lura rimna e conserva el differents bains culturals sco per exempel fotografias, dissegns, cudeschs u scrittiras da la Foppa.

Quai èn documents da persunas privatas che raquintan da la vita quotidiana dals antenats. Ina purschida, che para da cuvrir in grond basegn en la regiun: Suenter mo dus onns ha l'uniun gia survegnì millis documents.

Gia rimnà pli che 10'000 documents

Tenor il president da l'uniun Jan Andrea Bernhard sa chattan en l'archiv cultural actualmain passa 10'000 documents. Sper documents singuls ha l'archiv era savì surprender l'onn passà 15 relaschs pli gronds – uschia per exempel ils cudeschs da la destillaria Lang a Glion, fotografias e documents da l'anteriur selvicultur da la regiun Hans Calörtscher, u er il relasch dad Oscar Tschuor, il renumà cumponist da marschs (per exempel dal marsch S. Carlo).

Er il relasch da Donat Cadruvi tutga tar ils stgazis da l'archiv

Il pli impurtant ch'el haja savì prender encunter è tenor Jan Andrea Bernhard dentant il relasch da Donat Cadruvi cun blers manuscrits da cudeschs anc betg publitgads. In stgazi che Jan Andrea Bernhard na vul betg zuppar en l'archiv. Planisà è, ch'il commember da l'uniun Isidor Winzap edescha ensemen cun la Surselva Romontscha in cudesch cun novas istorgias da Donat Cadruvi.

audio
Bunura: Il relasch da Donat Cadruvi en l'Archiv Cultural Foppa
ord Actualitad dals 29.05.2018.
laschar ir. Durada: 2 minutas 14 Secundas.

Gia ponderar co engrondir l'archiv

Il success da l'archiv cultural Foppa e conturn haja dentant era ina vart negativa. Jan Andrea Bernhard haja da ponderar gia uss, co e nua ch'el pudess engrondir l'archiv. Sch'els survegnian vinavant tants documents, stoppia l'archiv pudair occupar ulteriuras localitads en radund 5 onns. Qua saja el gia en tractativas cun la vischnanca da Glion.

RR actualitad 07:10

Artitgels legids il pli savens