Trais ustarias da l’Arena Alva midan strategia. En il Galaaxy, en l’ustaria sin il Vorab ed en quella da Nagens na vegn betg pli cuschinà. I vegnan sulettamain stgaudadas e servidas tratgas gia cuschinadas.
Quest enviern si da Turitg
Che las tratgas vegnan quest enviern si da Turitg, ha da far cun la situaziun da l’aviatica. Quella n’è betg bain occupada ed uschia datti capacitads tar las firmas che produceschan la maglia per ils passagiers en ils aviuns. Sco che Reto Gurtner ha ditg, hajan els nizzegià quella largia per la Arena Alva.
A lunga vista vesa el dentant, che las tratgas savessan vegnir producidas en il Grischun. Gurtner va schizunt in pass pli lunsch e manegia, ch’in center da cuschinar pudass furnir pliras pendicularas en tut il chantun.
Buns cuschiniers per quatter mais en strusch da chattar
Cun far vegnir las tratgas da Turitg, hajan els savì schliar il problem da chattar cuschiniers. Chattar bun persunal per 4 mais saja adina stà in problem. Ch’i vegn ussa servir vid las maisas e betg pli sin las lingias da servir sasez, è ina adattaziun al Coronavirus.
Tut la gastronomia en l’Arena Alva è vegnida digitalisada, uschia che servir è daventà pli simpel. Igl osp emposta la maisa ed il gentar cun ses Handy ed el paja era grad cun quel. Cun quella optimaziun vegni a dar pli pauc moviment en las ustarias ed uschia sappian ins evitar contacts.