Siglir tar il cuntegn

Header

cuntegn

Arena Alva Cuschinà a Turitg – servì a Laax

Gist trais ustarias ch'avevan il sistem da servir sasez, vegnan adattadas, quai pervia dil Coronavirus.

Trais ustarias da l’Arena Alva midan strategia. En il Galaaxy, en l’ustaria sin il Vorab ed en quella da Nagens na vegn betg pli cuschinà. I vegnan sulettamain stgaudadas e servidas tratgas gia cuschinadas.

Quest enviern si da Turitg

Che las tratgas vegnan quest enviern si da Turitg, ha da far cun la situaziun da l’aviatica. Quella n’è betg bain occupada ed uschia datti capacitads tar las firmas che produceschan la maglia per ils passagiers en ils aviuns. Sco che Reto Gurtner ha ditg, hajan els nizzegià quella largia per la Arena Alva.

A lunga vista vesa el dentant, che las tratgas savessan vegnir producidas en il Grischun. Gurtner va schizunt in pass pli lunsch e manegia, ch’in center da cuschinar pudass furnir pliras pendicularas en tut il chantun.

Tge manegian auters territoris da skis?

Textbox aufklappenTextbox zuklappen

Ina cuschina gronda per tut il chantun saja da principi ina idea interessanta. Quai manegian differentas pendicularas ch'RTR ha dumandà.

Per il territori da skis a Savognin manegia il directur Christoph Passecker, ch'ina cuschina gronda na fetschia betg senn per mintga ustaria. Per ustarias che vulan porscher insatge pli spezial na saja la cuschina gronda nagin'opziun. Il trend saja plitost en direcziun cuschina locala e regiunala. Er il directur da las pendicularas dad Arosa manegia quai. A la fin stoppian dentant decider ils ustiers tge ch’els vulan porscher.

Il CEO da las pendicularas a Breil tema, che la qualitad da las spaisas pudess patir, sch'ellas ston vegnir transportadas sur pli lunga distanza. Ina cuschina che furnescha in territori da skis saja tenor el pussibel, ina cuschina per tut il chantun na vesa el pel mument betg.

Buns cuschiniers per quatter mais en strusch da chattar

Cun far vegnir las tratgas da Turitg, hajan els savì schliar il problem da chattar cuschiniers. Chattar bun persunal per 4 mais saja adina stà in problem. Ch’i vegn ussa servir vid las maisas e betg pli sin las lingias da servir sasez, è ina adattaziun al Coronavirus.

Tut la gastronomia en l’Arena Alva è vegnida digitalisada, uschia che servir è daventà pli simpel. Igl osp emposta la maisa ed il gentar cun ses Handy ed el paja era grad cun quel. Cun quella optimaziun vegni a dar pli pauc moviment en las ustarias ed uschia sappian ins evitar contacts.

RTR actualitad 12:00

Artitgels legids il pli savens

Scrollar a sanestra Scrollar a dretga