Malgrà che la svieuta da l'Arena Alva è s’auzada l’onn da gestiun 2015/16 per 1,6% sin prest 90 milliuns francs, èsi tuttina sa resultà la fin dal quint ina sperdita d'in milliun francs. Sco Reto Gurtner vegn cità en il rapport da gestiun ha questa sperdita trais raschuns. Il curs da l’euro e la mal’aura, dentant era la digren generala da giasts che vegnan a far vacanzas en Svizra. Il dumber da giasts da l'Arena Alva è sa reducì en cumparegliaziun cun l’onn avant per prest 50'000 sin rodund 850'000 persunas. Quai è 5,4% pli pauc. Ch'i n’ha betg dà ina pli auta sperdita è tenor il rapport da gestiun d'engraziar al bun resultat da la vendita d’abitaziuns en il Rock Ressort ed ad entradas ord lavurs per autras interpresas.
Reducir custs cun purschida flexibla
Las capacitads da transport da l'Arena Alva èn planisadas per sur 1 milliun osps. Da dis cun paucs osps sin pista chaschuna quella surcapacitad blers custs che smatgan sin la rendita da l’interpresa. Per reducir quels custs propona Reto Gurtner ina purschida da pistas flexibla. Tut tenor tge osps che van cun skis, duain tschertas pistas vegnir serradas. Uschia pudessan betg mo vegnir sminuids p.ex. ils custs d’electricitad, i duvrass era damain persunal. Quai sistem d’ina purschida flexibla da pistas n’è dentant anc betg pront per l’introducziun. I dettia anc pliras chaussas da schliar, uschia era la furmaziun dals pretschs per cartas d’ir cun skis. Nagin osp saja pront da pajar il pretsch cumplain sche mo ina part da las pistas saja en funcziun.
RR novitads 12:00