Tut las pendicularas ed ulteriurs implants da transport, ils bajetgs e l'infrastructura turistica sin la muntogna da l'Arena Alva SA vegnan integrads en la «Finanz Infra SA».
Quella è vegnida fundada avant prest 20 onns per la finanziaziun dals indrizs d'ennavar, e tutga gia a las trais vischnancas da Flem, Laax e Falera.
Midada fundamentala
L'entschatta settember han las trais vischnancas Flem, Laax e Falera communitgà ch'ellas veglian cumprar l'infrastructura da l'Arena Alva. Gist suenter la nova ha il president dal cussegl d'administraziun Reto Gurtner prendì posiziun.
L'iniziativa è vegnida da las vischnancas.
Davart il pretsch na vulevan en quest mument ni Reto Gurtner ni las vischnancas discurrer. Ins saja anc en tractativas enfin la fin dal mais settember.
Bunamain 100 milliuns francs
La cumpra da l'entira infrastructura turistica sin la muntogna da l'Arena Alva e da la Cassons SA custa 94,5 milliuns francs. Las trais vischnancas duain sa participar cun en tut 50 milliuns francs, ils 42,5 milliuns francs vegnan ord chapital ester da la Finanz Infra SA. A questa societad tutgan uss gia ils indrizs da far naiv en il territori da skis.
Il deal è bubi eifach – prendai u laschai star.
Las vischnancas da Flem, Laax e Falera han decis cun trais clers Geas a las radunanzas communalas ed a l'urna. Suenter la decisiun ha il president communal da Falera Norbert Good discurrì d'ina decisiun istorica. Cun la cumpra vulan las vischnancas impedir che las pendicularas giajan en mauns d’investurs da l’exteriur.