L’ambulanza Surselva, organisada da l’ospital regiunal, è responsabla per il servetsch d’ambulanza en l’entira Surselva. Uschia è ina ambulanza staziunada permanentamain a Mustér. Quai na tanschia betg, uschia ils responsabels da las pendicularas da Mustér e Sedrun. L’onn passà hajan ins gì marcant pli paucs giasts ed uschia era pli paucs accidents sin pista, ma tuttina saja stà da spetgar fin ad in’ura sin l’ambulanza, ina situaziun che na cuntentia nagin, uschia Silvio Schmid da l’Arena da skis Andermatt-Sedrun.
Tschertgà il dialog
Ils responsabels da las pendicularas han tschertgà il dialog cun l’ospital a Glion. Ma l’entschatta december èn las pendicularas vegnidas infurmadas che la situaziun cun las ambulanzas na sa midia betg, almain betg il mument. Uschia èsi stà da tschertgar ina soluziun a curta vista, di Silvio Schmid. Gia uss sajan els organisads uschia che pitschnas blessuras, per exempel vid in det, possian vegnir transportads tar il medi cun in taxi. Ma per las grondas blessuras che ston vegnir transportadas cun la schlieusa na devia quai fin uss nagina soluziun. Uss sajan els s’organisads cun ina interpresa privata che vegnia al lieu, cura che l’ambulanza è sin viadi u betg disponibla e chargia il pazient cun la schlieusa en il bus e direct tar il medi. Uschia na stoppia nagin spetgar e la situaziun saja schliada, almain per ils accidents sin las pistas, di Silvio Schmid.
Garantir provediment d’ambulanza per tuts
Ma la situaziun per tut las ulteriuras persunas, tant indigenas sco era giasts da vacanzas, na saja betg schliada. Per far quai dovria dentant l’engaschi da las vischnancas, la regiun a dal chantun, di Silvio Schmid. Quai saja necessari pertge cura che quai fetschia basegn, alura saja quai necessari che l’ambulanza vegnia ad uras al lieu, e quai da tut temp ed emportia betg nua, uschia Silvio Schmid vinavant. La soluziun stoppia dentant vegnir dal maun public e betg da privats, sco dapertut.
Ospital regiunal da la Surselva sa dosta
L'ospital regiunal conferma ch’i possia dar temp da spetga tar cas d’accidents. Sco la mainafatschenta Claudia Käch ha ditg envers RTR, haja quai dentant da far cun il fatg che las ambulanzas stoppian ademplir autas pretensiuns. Uschia stoppia adina in sanitari da salvament scolà esser preschent en l’ambulanza, quai che n’eria betg il cas enfin ussa tar l’ambulanza da la Cadi. Per accidents pli grevs po tenor Käch la Rega vegnir alarmada. Per tut ils auter cas fa ella attent sin il servetsch d’urgenza dals medis da chasa. Quels sajan medemamain organisads en in servetsch d’urgenza e possian vegnir clamads en cas d’urgenza sche l'ambulanza na saja betg disponibla. Pervi da mancanza da persunal na quinta Claudia Käch betg che la situaziun tar las ambulanzas sa midia a curta vista.